CYMA-in zirlai tiṭhate a chawimawi

Central YMA hnuaia Kum­puan Committee chuan nimin khan CYMA Hall-ah kumin High School Leaving Certifcate (HSLC) leh Higher Secondary School Leaving (HSSLC)-a Top 10-a lang Mizo zirlaite hnenah chawimawina an hlàn a, chief secretary Lalnunmawia Chuaungo-in a hmanpui.

Chawimawi inkhawm hi CYMA Kumpuan Committee chairman Lalhmachhuan­a, CYMA vice president-in a kaihruai a; Chief Secretary chuan, IAS, IPS etc. nih chu thil ropui ber a nih loh thu a sawi rualin, "A ṭhatna chu sawi tur kan hre chauh. Keimahni leh kan chhungkaw tan a ṭhat bakah, ram leh hnam tana ṭangkaina kan ngah," a ti.

Lalnunmawia Chuaungo chuan, Mizo society chu a nuam tih sawiin, "YMA leh kohhran a ṭha si. Chuvangin, Mizorama seilian phei chuan Mizoram chhuahsan a, vai rama hnathawh kan châk loh phah niin ka hria. Kei pawh ka awm châk lohna state-ah ka awm a, a lo nuam em em a, ka inchhîr lo," a ti a; central civil service-a lutte tan Mizorama awm hun a awm tho tho thu a sawi.

Bei fat fat ṭhinte chu Pathian­in a pui ṭhin tih sawiin Lalnunmawia chuan, "Eng anga ṭawngṭai nasa pawh ni ila, theihtawp chhuah loh chuan awmzia a awm lo. Thawhrimna leh taimakna nen ṭan in lak chuan in duh in ni dawn. Competition a sang tawh tihte chu tih mai mai, kan background ngaihtuahin kan hun lai pawhin a sang lutuk. Mizote central service-a kan tlin loh zel chuan officer liante hnam dang an ni vek dawn a ni," a ti.

CYMA president Vanlalruata pawhin thu sawiin, ram leh hnam humhalh kawngah YMA-in zirna an ngaih pawimawh ber thu a sawi a, "Zirna hi na taka kalpui kan duh a, Covid-19 vangin duh angin kan kal thei lo. Central service-ah Mizo kan tlem tual tual a, a manganthlak tawh tak zet a ni," a ti a; zirlaite chu ram leh hnam tan central service-a tlin tum turin a fuih.

Central YMA hian HSLC Top 10-a Mizo tling mi 15, HSSLC Top 10-a tling Arts-ah mi 13, Science-ah mi 10 leh Commerce-ah mi 13-te hnenah chawimawina thuchei leh pawisa an hlân a ni.