Mizorama lottery kalpui dan CAG mite'n an chhui mek
Mizoram sorkarin lottery a kalpui dan chu kumin kum tir aṭang khan Comptroller & Auditor General (CAG)-in an chhui
ṭan a, thla hnih chhunga chhui zawh an tum.
Union Home Ministry thupek angin CAG hian Mizoram sorkarin lottery a kalpui dan an chhui a, document pawimawhte an lâk bakahm Institutional Finance & State Lottery (IFSL) hnathawkte chu ziakin thil pawimawh hrang hrang an zawtfiah mek. IFSL-a thawkte chuan CAG zawhna an chhàn bakah, an chhanna tihchianna tur document-te an thawn zel a ni.
Mizoram sorkarin lottery atan hian online server pathum, Mumbai-ah pahnih leh Bangalore-ah pakhat a nei. Bangalore-a online server chu CAG-te'n thil dik lo a awm theih leh theih loh an enfiah tawh a; Mumbai-a online server-te pawh February 5, 2016 hian an endik leh ang.
Vanglaini palai zawhna chhangin Mizorama lottery buaipuitute chuan, an hriat phak chinah thil dik lo lian tham a awm an hriat loh thu an sawi a, "CAG pawh hian thil dik lo lian tham an hmuh chhuah kan ring lo. A lian tham ni lo eng emaw tihsual palhte chu kan lo nei mai thei," an ti.
Thu dawn danin, Kerala leh Kolkata-a mite'n lottery kalpui danah dik lo a awm nia hriain, Calcutta High Court-ah public interest litigation (PIL) an thehlut a; chumi kal zelah chuan Ministry of Home Affairs chuan Kolkata-a lottery ticket hralh ṭhin - Mizoram, Nagaland, Sikkim leh West Bengal sorkarte'n lottery an kalpui dan endik turin CAG a hriattir a ni.
PIL-ah hian lottery ticket hralh danah thil dik tâwk lo a awm thu te, rules & regulation zawm a nih loh thute leh thil dang hrang hrang tarlan a ni.
PIL thehluh chungchangah hian Mizoram sorkar chuan Calcutta High Court-ah insawifiahna a thawn tawh a; dik lo awm se chuan insawifiahna a thawn tawhah hian complaint an dawn tur thu leh, complaint an la dawn ngai loh thute an tarlang.
Hetih lai hian, chief minister Lal Thanhawla chuan Mizorama lottery kalpui danah thil dik lo a awm loh thu a lo sawi tawh a, "CAG-te'n Mizorama lottery kalpui a nih dan an audit tur thu hi telephone hmangin min rawn hrilh tawh. Duh tawkin rawn audit tura kan inhawn reng thu ka hrilh. Rawn audit se, state dangte tan pawha entawn tlakin kan kalpui tih an hmu chhuak zawk ang," a ti.