MZU kawng siam chhunzawm turin phût

Vaivakawn–Mizoram University kawngin a paltlang YMA branch pariatte chu nimin zing khan Chawlhhmun YMA committee room-ah an ṭhukhawm a; hna la thawh zawh loh chuan February 10, 2016 aṭanga chhunzawm turin thuneitute an phût.

MZU Road Joint YMA Committee chuan, Vaivakawn-MZU kawng siam chungchangah sorkar leh PWD hotute vawi tam tak an hmu tawh tih sawiin, "November 20, 2015-a PWD Chief Engineer (Building) a pisaa kan hmuhnaah CE-in January 2016 chhung ngeia hna thawh zawh an tum thu a sawi a ni," an ti a; November 22, 2015-a kawng siamtu Sunshine Overseas hotute an hmuhnaah pawh a rang thei ang bera thawh zawh an tum thu an lo hrilh tih an sawi.

MZU Road Joint YMA chuan, kawng siam hna chu kum 2012-a ṭan tawh a ni chunga tun thlenga Ch.Chhunga High School leh Ropaiabawk inkar km. 1.8-a thui siam zawh a la ni lo chu hriatthiam har an tih thu sawiin, "Kawng hmangtu mipuite leh zirlaite ngaih pawimawh lohna leh zahlohna lian takah kan ngai," an ti.

MZU Road Joint YMA Committee chuan, Vaivkawn-MZU kawng chu siam zawh vat a nih theih nan theihtawpa hmalak chhunzawm an rel a; February 10, 2016 aṭanga hna thawh chhunzawm a nih loh chuan na taka hmalak an rel a ni.