Mizoram pumah kum 5 chhungin Cancer natna vangin mi 3,267 thi

Vawiin February hi World Cancer Day a ni a, thupui chu 'We can, I can' tih a ni. Aizawlah chuan Health department bultumin Chanmari YMA Hall-ah hman a ni ang. Mizoramah kum nga chhungin, December 2015 thleng khan cancer vangin mi 3,267 an thi.

Health Services deputy director leh National Programme for Prevention & Control of Cancer, Diabetes, Cardiovascular Diseases & Stroke (NPCDCS) state nodal officer Dr Eric Zomawia hnen aṭanga thu dawn danin, Mizoram PBCR Report December 2015-ah chuan kum nga chhungin Mizoramah cancer vei 6,403 hmuh chhuah an ni a, kum nga chhung vek hian cancer vangin mi 3,267 an thi a ni.

NPCDCS State Nodal Officer chuan, Economics & Statistics department-a Registry of Births & Deaths report-ah chuan, Mizorama thihna tam ber chu cancer a nih thu leh, Mizoram chu zuk leh hmuam tih nasatna ber state a nih thu a tarlang.

Kum 2001 aṭangin Mizoramin cancer statistics dik tak nei turin National Cancer Registry Programme (NCRP)-ah a tel ve ṭan a; kum 2001-2002 chhunga India ram district hrang hranga cancer hluar dan zir chianna ‘Atlas of Cancer in India Project’ ah Mizorama district-te chu cancer hluarna ber district an ni. Kum 2003-a Population Based Cancer Registry (PBCR)-ah pawh Mizoram chu cancer hluarna ber state a nih thu tarlan a ni bawk.

NCRP report hnuhnung ber, December 2014-ah chuan PBCR 25 zingah Mizoramin a ber nihna chi kua a nei a; chungte chu - mipa cancer, hmeichhe cancer, pumpui cancer (mipa leh hmeichhia), chuap cancer (mipa leh hmeichhia), chhûl hmáwr cancer, mipa thin cancer leh hmeichhe hrawk chung cancer-te a ni.

NPCDCS State Nodal Officer chuan, Zemabawka Mizoram State Cancer Institute tihchangtlunna turin sorkar laipui aṭangin NPCDCS hnuaiah cheng vbc. 45 pek a nih thu a tarlang bawk.