Congress office sak tumna duh loin Champhai NGO-in PIL thehlut dawn

Champhai District NGO Coordination Committee-te chuan February 2, 2016 khan Champhai Press Club-ah chanchinbumite an kâwm a; Champhai South Block Congress party-in DC hmun hluia Congress Bhavan sak an tum an duh loh avangin Gauhati High Court-ah public interest litigation (PIL) thehluh an tum thu an puang.

Champhai NGO Coordination Committee president David Thangluaia chuan, Champhai South Congress-in DC complex hluia Congress Bhavan sak an tum chungchang chu January 21, 2016 khan NGO hrang hrangte'n an sawiho tawh thu sawiin, "Vantlang hmuna political party malin office an neih hi ṭha kan ti lo a, an hmalakna a rang thei ang bera titawp turin vawi eng emaw zat kan ngen tawh. Kan ngenna an tihhlawhtlin loh avangin PIL thehluh kan tum a, hemi atan hian signature campaign kan nei ang," a ti.

Champhai NGO-te sawi danin, Champhai Keifangtlanga DC office sawn a nih aṭangin DC hmun hlui chu khawtlang tana a ṭangkai thei ang bera hman turin khatih hun laia sorkar hotute leh khaw­tlang ṭangrualin an rêl tawh. Kohhran pathumin biak-in sakna atan an dil bakah, mimal, pawl leh sorkar department eng emaw zatin office leh quarters sakna atan an dil tawh bawk. Mahse, mipui vantlang tana zuah a ni tih an hriat avangin an inhnûkdûwk vek a ni.

Kum 2011 khan rulling party thil tih theihna hmangin Champhai South Congress chuan an president hmingin LSC an siam a, an party office sakna turin ruahmanna an siam tih hriat chhuah a ni.

DC Complex hlui sah­thlak tumna a awm tih Champhai NGO-in an hriat velah office bearer pathumte chu Aizawlah tír nghalin, chutih laia Revenue department changtu minister JH Roṭhuama, Champhai South bialtu MLA chu a inah an lên chilh a; party office sa tura an hmalakna kal mek titawp tur leh DC hmun hlui LSC chu mipuite tana hlân lêt (cancel) turin an ngen a ni.

Hun eng emaw chen a reh vang vang hnuah, tun hnaiah Bhavan Building Committee member-te inruatin, FCSCA departmentquarters-te ṭhiah an tum a, in luahtute pawh chhuak tura tiin, hma an la thar leh a ni. Congress party chu an hmalakna titawp tur turin NGO Coordination OB-te chuan Bhavan Building Committee chairman lên chilhin an ngen nawn leh a; mahse, Champhai khawtlang tana an ngennate chuan tun thlengin kawngro a la su lo tih an sawi.