Larsapin Regional Agri-Fair 2016 a hawng

Central Agriculture University (CAU), Imphal chuan nimin khan College of Veterinary Sciences & Animal Husbandry, Selesih campus-ah CAU Regional Agri-Fair 2016 an buatsaih ṭan a, Governor Lt.Gen. Nirbhay Sharma-a'n a hawng.

Regional Agri-Fair 2016-ah hian India hmarchhak state-te an tel kim bakah, Tamil Nadu an tel a; dawr 36 hawn niin, loneitu leh kut hnathawktute mamawh hmanrua te, ran vulh chi hrang hrang, thei chi hrang hrang, thlai rah chi hrang, huan thlai enkawl kaihhruaina lehkhabu, pangpar, thawmhnaw leh ei turte lei theih a ni. Vawiin leh naktukah chhunzawm a ni ang.

Governor chuan, Mizo­rama thei leh thlai enkawl dan chu organic farming a ni tih sawiin, organic farming huanga sumdawnnaah US dollar tluklehdingawn 60 a chêt mek thu leh chutah chuan India-in 1% chiah chanvo a neih thu a sawi.

Mizoram leilung, sik leh sate chu thlai leh thei chi tinrengin an ngeih em em tih sawiin, Larsap chuan, "Thlaite chu organic farming hnuaiah awmze nei zawka kalpui a nih chuan a hlâwk hle ang... Huan thlai siam, ranvulh leh sangha khawi kal kawppui hi uar zawka inkawhhmuh a ngai a ni," a ti.

Assembly deputy speaker R Lalrinawma leh CAU, Impjhal vice chancellor Prof. M Prejit Singh te pawhin thu an sawi a; Prof. M Prejit Singh chuan, "THenzawla Horticulture College din tur chu July 2016 chhung ngeia hawn a nih theih nan leh zirlaite'n class an ṭan theihna turin hmalak mek a ni," a ti.

College of Veterinary Sciences & Animal Husbandry, Selesiha dean Dr D Kathiresan sawi danin, nikum khan an college-in JRF exam-ah India ramah pakhatna an hauh a; tun dinhmunah All India Vety College ranking-ah 6-na an hauh mek a, CAU, Imphal hnuaia college lian ber an ni mek. College of Veterinary Sciences & Animal Husbandry, Selesih-ah department 14 a awm a, department parukah Ph.D zir theih a ni.