Chapchar Kût hman dan tur sawiho

March 4, 2016-a Chapchar Kût hman dan tur ngaihtuahin nimin khan Chapchar Kut Programme Committee chu Art & Culture director R Hmingthanzuala hoin a pisaah an ṭhukhawm.

Meeting-ah hian, kum danga Chapchar Kût hman tawh dante sawi thlirhoin, kum dang aia ṭha zawka hman dan tur ruahmanna siam ṭha an ti a; rawtna hrang hrang an neihte chu Chapchar Kut Organising Committee pawmpui tura chhawpchhuah a ni ang.

Committee-ah hian Traffic SP, IPR, Tourism leh Art & Culture department hotu te, Central YMA, MJA leh MCO aiawhte leh sawm bik mi pariat an tel a ni.

Saihaah pawh Chapchar Kût hman dan tur ngaihtuah­in Saiha DC R Zarzosanga hoin a pisaah an ṭhukhawm. DC chuan, Chapchar Kût chu hlim leh uar taka hman a nih theih nan tlawmngai pawl hrang hrang hruaitute leh department hrang hrang hotute ṭan la turin a sáwm a ni.