Lily Vengah chhungkaw 2 aṭangin Hripui vei mi 8 hmuh chhuah a ni

Chaltlang Lily Veng LTF hruaitute hnen aṭanga thu dawn danin, ZMC-a hmuh chhuah Covid-19 vei mi pariatte hi police-te chhungkuaa mi panga (police tel loin) leh an in hnuaia mi pathum an ni a; chutih rualin, tun dinhmunah an chhungkuaa chêng zawng zawngin an kai vek lo a, kai lo mi paruk an awm. Hripui vei hmuh tharte hi nimin khan State Referral Hospital-ah lak nghal an ni.

Lily Veng LTF chuan, Covid-19 vei hmuh chhuahah a kaihhnawih a tam avangin swab sample lak vat a, endik vat a ṭul thu sawiin, "Tunah hian khaw pathumah lockdown a ngaih phah a, veng ṭhenawm hnaivai an rálkhèl viau bawk. Chaltlang Lily Vengah chhungkaw paruk páwn­chhuak loa quarantine tír mek an ni," an ti.

Chaltlang Lily Veng LTF secretary Lalfakawma chuan Vanglaini palai zawhna chhángin, nimin khan contact tracing an buaipui char char tih a sawi a, "Kan hriat theih chinah first contact ang chi hi mi 33 an awm a, chu'ng mite chu swab sample test nghal turin Health department lam kan ngen a, vawiin tlai aṭangin sample hi an rawn la nghal. A hmaa contact tracing kan tihnaa sample test ngai mi pathum dang an awm bawk," a ti a; mi 33 tih loh mi dangte chu nghah rih tur a nih thu a sawi.