MNF-in VC/LC tam tak kan la dawn - MNF Vice President

MNF vice president Lalthlengliana chuan, Mizorama village council leh local council in­thlan turah MNF party-in VC/LC ṭhahnem tak an la dawn tih a sawi a; Congress party leh ZPM party chu khaw eng emaw zatah an thawkho niin a sawi bawk.

Lalthlengliana hian August 11, Thawhlehni tlai khan Zuangtuia LC candidate puanna inkhawm­ah thu sawiin, "Kan hnathawh ṭhat vang­in VC/LC ṭhahnem tak kan la dawn," a ti a; Cong­ress leh ZPM-te'n chak loh an inrin avang­in inthlan sawn hlat an ngên chung nia sawiin, "Mal din tura insawi siin Congress leh ZPM-te hi khaw ṭha­hnem takah an thawkho a, zia­ráng inang an ni a, a àwm tho mai," a ti.

MNF Vice President chuan, chawp leh chilha VC/LC inthlan buatsaih angin ZPM President-in MNF sorkar a puh tih sawiin, "Hei chen hi inthlan buatsaih mai loin an term pawhsei a ni tawh a, pawhseina hun pawh a ral leh tawh a, inbuatsaih nan hun tháwl thui tak a awm," a ti a; lian ve tâwka insawi ZPM tan inthlan chu cho hliah hliah àwm a nih laiin, an cho lo niin a sawi.

Lalthlengliana chuan, Covid-19 hripui chung­changa Mizoram­ sorkar hmalakna a ṭha tâwk nia sawiin, chu chu party dangte pawhin an hmuhpui niin a sawi a, "Cong­ress President leh Vice President pawhin engmah an sawi loh laiin Pu Zo­dintluanga hian fel ber ang hrimin min sêl a, a ṭawng chhuak tam ber a ni ta. Zu zawrh chungchang te, Zo carbon chung­changa truck thlâwk thei pawh kha kan la hre vek ang, kan chhui zui zel dawn," a ti.