World Cancer Day hman a ni

National Programme for Prevention & Control of Cancer, Diabetes, Cardiovascular Diseases & Stroke (NPCDCS) leh National Programme for Prevention and Control of Deafness (NPPCD) buatsaihin nimin khan Chanmari YMA Hall-ah World Cancer Day hman a ni a; Health minister Lal Thanzara khuallian a ni.

Health Minister chuan, Mizote zinga cancer a hluar lutuk chu ṭan tlân chuan tihtlem theih a nih thu sawiin, "Cancer hi a tìr têa hmuh chhuah a nih chuan 90% enkawl dam theih a ni. Mizoram mipui nunna suattu ber cancer hi thlir liam mai loa a do nan leh a tihkiam nan theihtawpa ṭan tlan a ngai a ni," a ti.

Lal Thanzara chuan, kum 2014-a Mizo-ramah NPCDCS bul ṭan a nih aṭanga kum hnih hnuah thawktu 100 chuang an awm a, district paruk tuam tawh niin, hmun hrang hranga inentirna buatsaih a nih thu a sawi.

Health Minister chuan, Zemabawka State Cancer Institute tihchangtlunna tur project chu sorkar laipuiin pawmpuiin, NPCDCS hnuaiah cheng vbc. 45 a pek turah a thawh khatna atan vbc. 14.64 a pe chhuak tawh tih a sawi a, "He sum hmang hian Mizoram State Cancer Institute changtlung, khum 100 awmna siam tum a ni," a ti.

World Cancer Day hmannaah hian khualzahawm, Health secretary Lalrinliana Fanai, Hospital & Medical Education director Dr Lalbiakkima, NHM mission director Dr Lalbiakzuala te pawhin thu an sawi.

NPCDCS state nodal officer Dr Eric Zomawia'n cancer leh natna inkai chhawn theih lohte chungchang leh a inven dante a sawi a; MSCI-a medical oncologist Dr Jeremy Pautu-in World Cancer Day thupui 'We can, I can' tih a sawi bawk.

World Cancer Day pual hian inkhawm zawhah NPCDCS leh NPPCD ten a thlawna inentirna, Special Non Communicable Disease (NCD) Clinic an buatsaih a ni.

World Cancer Day hi district khawpui dangah pawh hman a ni.