Taxation-in kum 2015 April-December chhungin Rs. 1,77,26,73,865 an hmu

5th February, 2016

Sorkar kum kal meka thla kua, April-December 2015 chhung khan Taxation department chuan chhiah chi hrang hrang Rs. 1,77,26,73,865 an hmu tawh.

Taxation department aṭanga thu dawn danin, kum 2015-16 chhunga Taxation department-in chhiah chi hrang hrang aṭangin Rs. 2,59,75,00,000 hmuh an inbeisei (target) a; thla kaw chhunga an hmuh tawh Rs. 1,77,26,73,865 chu 68.23% a ni. December 2015 thla bikah chuan Rs. 7,25,03,532 an hmu.

December 2015 thlenga chhiah hmuh tawh zingah hian, Professional Tax aṭangin Rs. 11,14,82,401 an hmu a; Sales tax aṭangin Rs. 1,65,58,57,454 an hmu. Entertainment Tax aṭangin Rs. 50,03,490 an hmu bawk.

Taxation department hotute chuan, kumina Mizorama khelh
ṭan, I-League inkhel enna ticket aṭangin Entertainment Tax an lak thu an sawi a; inkhel enna tur ticket chu hralh chhuah a nih hmain a neitu (Aizawl FC)-te'n Taxation-ah an hriattir a, chhiah chu ticket man aṭanga 12.5% an la tih Vanglaini palai an hrilh.

Zawhna chhangin Taxation hotute chuan, Mizorama sorkar hnathawkte'n chhiah an pek ṭhin, Professional Tax chu tihdanglam tumna a la awm lo tih an sawi.

Taxation hotute sawi danin, Mizoram sorkar hnathawkte
aṭangin Professional Tax hi kum khatah Rs. 2,500 lak a ni a, sorkar hnathawk zawng zawng, group A
aṭanga group D thlengin an pek zat a inang vek. Rs. 2,500 hi Parliament-in a pass angin, sorkar hnathawka Professional Tax lak theih sang ber (upper ceiling limit) a ni.

Upper limit ceiling hi Rs. 12,000-ah tihpun turin Finance Commission-in a lo rawt tawh a, mahse Parliament-in a pass ta rih lo tih an sawi a, "Upper limit ceiling hi tunah chuan tihdanglam theih a ni rih lo. A hniam lamah chuan bithliah a awm lo a, state sorkarin a duh chuan a tihniam thei a, mahse, tihniam tumna a la awm lo," an ti.

Professional Tax atan hian sorkar department pakhata thawkte chu department DDO-in an hlawh aṭangin Rs. 2,500 an la ṭhen a, chu chu Taxation department-ah a hlawmin an chhûng lut ṭhin a ni.

Taxation department hian kum 2014-15 chhung khan chhiah
aṭangin Rs. 2,27,29,04,225 an hmu a, target Rs. 2,35,41,00,000 an hmu tling lo. Professional Tax aṭangin Rs. 14,34,08,188 an hmu a; Central Sales tax aṭangin Rs. 3,95,475, VAT aṭangin Rs. 1,47,88,03,625, POL aṭangin Rs. 63,95,90,704, Entertainment Tax aṭangin Rs. 97,83,130 an hmu a ni.