Larsap leh MPF hruaitute an inkâwm

Governor Lt.Gen. Nirbhay Sharma leh Mizoram People's Forum (MPF) hruaitute chu nimin khan Raj Bhavan-ah an inkâwm. Larsap chuan, MPF hmalakna chu inthlan kalphung siamṭhatna atan India ram mamawh ber pakhat a nih thu a sawi.

Larsap chuan, MPF hnathawh leh mipui tana an inpeknate chhuanawm a tih thu sawiin, "MPF pawl hlawhtlinna ropui tak chungchang leh state dang tan entawntlak ka tih thu inchhuang takin chief election commissioner Dr Nasim Zaidi ka hrilh tawh. MPF hmalakna hi India ram pumpuiin electoral reform kalpuina atana mamawh ber pakhat a ni," a ti.

Mipui leh kohhran thlawpna an neih ṭhat avangin MPF hmachhawp pawimawh tak pakhat, Good Governance Project chu a la hlawhtlin a rin thu sawiin, Governor chuan, MPF hruaitute chu Mizoram kalsiam leh ṭhalaite hmakhua tur ruahmanpuiah a sáwm a ni.

Skill development-ah ṭhalaite puih an ngaih thu sawiin, Nirbhay Sharma chuan, "Mizo ṭhalaite tihhmasawnna kawng dap hi tun dinhmuna hna hmanhmawhthlak ber a ni. KMMTTP a puitlin hunah kan ṭhalaite an lo inpeih hman si loh chuan buaina namên lo kan tawk thei dawn. Project zawh hma ngei hian kan ṭhalaite hna thiam leh chhawr tlaka chher an nih theihna atan MPF, Central YMA leh NGO dangte'n sorkar an thawhpui a ngai," a ti.

Governor hmuhnaah hian MPF vice president Rev.Dr Sangthanga, general secretary Rev.Dr R Lalbiakmawia leh secretary Vanlalruata te an tel a; Mizorama sorkar ṭha a awm theihna atana an hnathawh dante an sawi a ni.