KHAWTHLIR

AR-in tanpui

39 Assam Rifles chuan DG(AR) Civic Action Programme hmalakna kal zelah Sailutar leh Ratu khaw mipuite hnenah ṭanpuina an hlan. Sailutar khua hi Vocational Training Centre-a hman turin puanṭhui khawl paruk leh plastic chair pariat an pe a, Ratu khaw hnenah hian vantlang inthiarna leh bual-in sak zawh tawh an hlân thung.

Hnathawh sawiho

Chief secretary Lalmalsawma hoin nimin khan CS conference hall-ah Natioanl Highway-54, Aizawl-Tuipang kawng siamṭhat leh tihzauh hna thawh ṭan dan tur sawiho a ni. Meeting-ah hian hna thawktu tur National Highways & Infrastructure Development Corporation Ltd. hotute leh sorkar official-te an tel.

Heroin man

Excise & Narcotics department-a Anti-Narcotics Squad leh Electric Veng VDP ṭang
-kawp chuan, February 3, 2016 tlai dar 3 khan heroin gram 13 leh a neitua puh Vanrimawii (34) d/o Lianthanga leh, Lalrinawmi (33) d/o Lalzara, Dawrpui Veng nia insawite an man.

Science workshop

Directorate of Science & Technology (DST) leh Lunglei District Education Office ṭangkawp chuan nimin SSA Recreation Hall, Lunglei-ah Lunglei leh a chhehvela high school-a science zirtirtute tan, 'Sensitization workshop on basic cciences' tih thupui zirhona an buatsaih.

Hnathawk tha puanzar sawiho

NLUP hnuaia hmalakna leh beneficiary entawn tlakte chanchin mipuiin an hriat theihna tura zau zawka puanzar a nih theih dan tur nimin khan Mamit DC Lalbiaksangi hoin DC conference hall-ah sawiho a ni.

Award hlan

Education director K Lalthawmmawia chuan, nimin khan a pisa-ah January 20-24 inkara Punjab-a neih zawh tak, 61st National School Games (U-17 Karate)-a medal late Incentive Cash Award a hlan. Award hi mi pali hnenah hlan a ni.