2014 aiin 2015-ah thubuai a tlem Ram tikângtute hrem a ngai: DIG

Nimin khan DIG (Northern Range) LT Hrangchal hoin a pisaah crime review meeting neih a ni a, DIG (NR) huam chhungah kum 2014 aiin 2015-ah thubuai ziah luh a tlakhniam thu tarlan a ni. LT Hrangchal chuan, ram tikângtute laka action lak a ṭul thu a sawi.

DIG chuan, kum 2014 aia 2015-a thubuai ziah luh a tlem chhan chu police leh mipui-te thawh rah a nih thu a sawi a, "A pumpui thuah dan leh thupek kenkawhna leh sualna ven chung-chang a ṭha thawhkhat a, a lungawithlaka ngaih a ni. Thil pakhat langsar tak erawh chu, hmeichhe naupang pawngsual leh khuaikhem thubuai 111 ziah luh a ni a, hei hi POSCO Act hman thar vang ni tho mah se, kan society-ah hian eng emaw dik lo a awm a ni," a ti.

LT Hrangchal chuan, naupang pawngsual leh khuaikhem thubuai a tam lutuk chu tlawmngai pawlte leh kohhrante'n zir chiangin, tun aia nasa lehzualin ṭan la se a duh thu a sawi.

Khua a ṭhál chho leh dawn hnaih avangin kângmei ven a ṭul thu sawiin LT Hrangchal chuan, "Ram tikângtute lakah action lak a
ṭul," a ti a; SP-te chu district/thana level-ah V/C, NGO leh Environment & Forest department nena ṭang tlanga kângmei chhuak tur ven kawnga ṭan la turin a chah.

Meeting-a tarlan danin, DIG (NR) huam chhungah kum 2014-ah lirthei chetsualna vanga thihna ṭum 58 a awm a, kum 2015-ah chuan lirthei chetsualna vanga thihna ṭum 35 a thleng. Kum 2014-ah thubuai 2,185 (IPC 1,813 leh Non-IPC 372) ziah luh a ni laiin, kum 2015-ah chuan thubuai 2,178 (IPC 1,899 leh non-IPC 279) ziah luh a ni.

Meeting-ah hian DIG (NR)-in a huam chin - Aizawl, Champhai, Kolasib, Mamit leh Serchhip SP bakah Traffic SP-te an tel a ni.