Chhiatrupna thlena inbuatsaihna sawiho

Champhaia sorkar office hrang hranga hotute chuan nimin khan DC conference hall-ah chhiatrupna thlen thulha an department-te ṭheuh thawh tur leh inpuahchahnate an sawiho a, DM&R sceretary PC Lallawmsanga'n a hman pui.

PC Lallawmsanga chuan office tinte chuan disaster management chung-changah anmahni plan ṭheuh an siam tur a nih thu sawiin, "Department hrang hrang inkarah thawhhona ṭha neih a, mahni chanpual ṭheuhte hriatchian a ṭul. Chhiatna a lo thlenin mi zawng zawngin DC office-ah inpum nghah chu thil theih loh a ni," a ti a, department tinte'n mahni inralrin ve theih dan tur leh hmalak dan turte chiang taka an ngaihtuah a ṭul thu a sawi.

Mipuite pawhin ram leh loah te hian insurance tih nachang hriat a pawimawh thu sawiin DM&R Sceretary chuan,"Neih thing-lung khawnga meuhva kan in sakte hi kan lo insure si loh chuan chhiatna lo thlengin, lo chhe ta vek se, in han din ṭhat leh chu thil huphurhawm duh tak a ni dawn a ni," a ti.

Thusawitu dang DM&R director C Lalpeksanga chuan plan siam mai chu thil harsa ni lo mah se, hman ṭangkai tak tak theih tur siam ngei a pawimawh thu a sawi a; chhiatrupna a thlen thulha an inpuahchahna turah CSS scheme nei department te chu an budget aṭanga 10% chu disaster fund atana hman theih tura dah turin rua-hmanna siam a nih thu a sawi.