Zu zawrh tihtawp nan ṭawngṭai rêl

5th February, 2016

Mizoram Baptist Kohhran Hmeichhe Pawl (MBKHP) Rorèl Inkhâwm vawi 66-na chu nimin khan BCM Tlabung Kohhranah neih a ni a; Mizorama zu zawrh phalna tihtâwp a nih theihna atan chaw ngheia ṭawngṭai an rél.

Rorel inkhawm hi MBKHP president F Lalrochami’n a kaihruai a; Executive Committee aṭanga thu lût pahnih leh bial aṭanga lût 47 sawiho a ni. Zu zawrh phalna tihtâwp a nih theihna atan chaw ngheia ṭawngṭai an rel bakah, zu zawrh phalna titâwp tura sorkar ngen rawt-na an pawm bawk.

MBKHP Rorèlna In-khâwm hi inkhawmpui awm loh kumah neih ṭhin a ni a, tun ṭumah hian BKHP dinna hmun hrang hrang aṭangin palai 460 vel an tel a, nakkum Rorèl Inkhâwm chu Theiriat pastor bialah nghah a ni ang.

MBKHP inchhiarna hnu-hnung bera tarlan danin, Mizoramah MBKHP member 29,135 an awm mek a, unit 429 awmin pastor bial 80 a awm mek a ni.