Gauhati High Court judge-in Mamit District Jail a tlawh

Gauhati High Court judge Justice Michael Zothankhuma, Mizoram State Legal Services Authority (SLSA)-a executive chairman ni bawk chuan nimin khan Mamit District Jail a tlawh a, Mamit IPR conference hall-a para legal volunteer (PLV)-te intuaitharna hun a hmanpui bawk.

Justice Michael Zothankhuma hian nimin zing khan Mamit District Jail a tlawh a; jail-a táng mekte dinhmun enfiah­in, harsatna an neihte a ngaithla a, jail building leh hmunhmate a enfiah a ni. Judge hi Mamit DC Dr Lalrozama leh SLSA hotute'n an ṭawiawm.

PLV-te intuaitharnaah Justice Michael Zothankhuma chuan, PLV-te hna leh tih tur ber chu dan hnuaia mi dangte ṭanpui a ni tih sawiin, "Mi harsa leh thil hre lo zawkte'n court sang zawk thleng kher loa an awm hmuna an harsatna chinfelpui te, thingtlang mite'n sorkar hmalakna leh ṭanpuina awm thei tur hrilh kawnga mi dangte ṭanpuite a ni," a ti.

SLSA Member secretary R Vanlalena pawhin thu sawiin, PLV- te chu mi dangte ṭanpuina kawng­ah phûr zawka thawk zel tur te, harsatna an neihte leh an hlawhtlinna te, an hmachhawp atana hriat belh duh an neihte sawi chhuak turin a chah.