Rabi season atana inpuahchahna thlirho

Agriculture Development Board chu August 11, Thawhlehni khan an chairman C Lalrinsanga, Agriculture minister hoin a pisaah an ṭhu a, Rabi season (thlasik lai) atana inpuahchahna tur ruahmanna an thlirho.

Agriculture Minister chuan, Rabi season atana inpuahchahna chu thla hmasa aṭanga kalpui tawh a nih avang­in loneitute dinhmun hre rengin Board ṭhutkhawm chu tihmâkmawh a nih thu a sawi a, "Kumin Kharif season-ah Agriculture department chuan vaimím chíngin hma a la a, tun­ah hian a thar hun a nih tâk avangin post-harvest programme ruahmanna awm tawhte thlirho vat a ṭul. Rabi season atana inpuahchahna tur ruahmanna siam thuai a nih loh chuan Covid-19 vangin a khawtlai palh thei a ni," a ti.

Kumin Rabi season-a chìn uar atan field pea, rajma leh tél anṭam thlan a ni. Heng thlaite chìn nan hian National Food Security Mission hnuaiah ram hectare 920 leh SEDP hnuaiah ram acre 1,400-ah inthlûrbing ni se, an ti a, thlai thar hma leh hlâwk ngaihtuah ran tum niin, loneitute mamawh hrang hrang pawh a hma lama ngaihtuahsak an rél.

Kharif season-a vaimîm chìn dan tur inkaihhruaina an lo siam tawh angin, Rabi season-a hman tur inkaihhruaina felfai leh khawng taka kalpui tur siam leh a pawimawh thu sawi a ni bawk. Kumin Kharif season liam turah hian Mizoram farmers' interest group hrang hrang 79-te'n ram acre 2,500-a zauah vaimim quintal 20,000 vel an thar tura target siam a ni a, chu chu an pha thei tura ngaih a ni.