Kau-Tlabung leh Tuipanglui HP-ah ACB-in chargesheet an thehlut tawh

Kau-Tlabung Mini Hydel Project leh Tuipanglui Mini Hydel Project chungchang chhuitu Anti Corruption Bureau (ACB) chuan tun hnai khan an chhuina report (chargesheet) chu Court-ah an thehlut. Chargesheet-ah hian thil tisuala rinhlelh (suspect) mi pali hming tarlan a ni.

Chargesheet-a a lan dan chuan, thil dik lo tia rinhlelhte chu Liansanga, PWD engineer-in-chief (Rtd); Lalnunmawia Sailo, Power & Electricity chief engineer (Rtd); Laldawngliana, P&E SDO leh, Swopan Kumar Roy, sumdawngte an ni. Chargesheet hian nimin khan District & Session Court a thleng nia thu dawn a ni.

He thubuai chungchangah hian mi pakuain anticipatory bail an dil angin phalsak an lo ni tawh a, chargesheet-ah erawh mi pali hming chiah a lang. Thuhretu atan mi eng emaw zat chu hman an ni dawn niin an sawi.

Kau-Tlabung MHP leh Tuipanglui MHP siamnaah sum tihchingpen a awma hriat vangin PRISM chuan October 3, 2008-ah ACB-ah FIR an thehlut. ACB chhuina aṭangin May 13, 2010-ah Kau-Tlabung kaihhnawihah PWD leh Power & Electricity engineer pariat leh Tuipanglui kaihnawiah engineer pakua thubuai siamsak tura tih an ni.

July 2, 2010-ah Mizoram sorkarin ACB chu thubuai hnûkdâwk turin a hriattir a; chuvang chuan PRISM chuan Gauhati High Court, Aizawl Bench-ah August 25, 2010-ah PIL an file a ni. PIL chu February 15, 2011-ah High Court-in a pawm a, Principal Bench, Guwahati-a ngaihtuah turin a dah.

High Court chuan March 17, 2015-ah Chief Justice (acting) PK Saikia chuan thuremna a tichhuak a, thuremna chhuah aṭanga thla ruk ral hmaa engineer-te lakah Special Court-a eiruk thubuai thehlut turin ACB thu a pe a ni.

High Court thutlukna chu Mizoram sorkarin Supreme Court-ah a khinglet a, sorkar petition thehluh chu Supreme Court-in May 11, 2015-ah a ngaihtuah a, mahse Supreme Court chuan Mizoram sorkar petition chu a hnawl a ni.