March 1-ah Food Security

Food, Civil Supplies & Consumer Affairs minister John Rotluangliana hoin nimin khan a pisaah department hotute'n Mizorama National Food Security Act 2013 hman hun tur leh kalpui dan tur an sawiho a; Food Security chu March 1, 2016-ah hman ṭan turin an rel.

John Rotluangliana chuan, Food Security Act (FSA) hman ṭan a nih thuai theih nana department mite thawhrimnaah lawm thu a sawi a; FSA chu peih fel thawkhat ni tawh mah se, thla laklawhah buhfai pek a nih loh avangin February thla laihâwl aṭangin hman ṭan a remchang lo a, March 1 aṭanga hman tan tur a nih thu a sawi.

Meeting chuan, FSA tlangzarh hun atan February 25, 2016 an tinzâwn a, tlangzarh (launch) turin chief minister Lal Thanhawla sàwm an rel. FSA hman a nih hunah chuan ration card chu rawng chi thum a awm dawn tih an sawi.

Meeting-ah hian district hrang hrang DCSO-te'n FSA hmang tura an hmalak tawhna leh an dinhmun an sawi a; NIC/WIPRO official-te'n Targeted Public Distribution System (TPDS) computerise tura an hmalak dan sawiin, data base, online allocation module leh online grievance module-te an peih fel thawkhat tawh thu an sawi a ni.

Meeting-ah hian FCSCA Secretary, Director, DCSO-te leh NIC/WIPRO official-te an tel a ni.