Water way atana thlan zingah Tlawng lui telh a ni - CL Ruala

Lok Sabha MP CL Ruala chuan, sorkar laipuiin ram chhunga tuikawng (water way) 106 a thlan chhuah zingah Tlawng lui a tel ve tih a sawi.

Nimina Congress Bhavan-a MPCC inkhawmah thu sawiin, CL Ruala chuan, India rama water way-a siam tum 106 zingah Tlawng lui a tel ve chu lawmawm a tih thu a sawi.

Hemi chungchanga Vanglaini palai zawhna chhangin CL Ruala chuan, water way atan Tlawng lui thlan a nih hian, a tak taka hman theih a nih dawn leh dawn loh enfiah (investigate) hmasak phawt tur a nih thu a sawi.

Lok Sabha MP chuan, water way atana Tlawng lui enfiah thuai a beisei thu sawiin, "Tun hma pawhin kan water way pawimawh tak a ni a. Lawng lian kaltir chu a buaithlak ang a, lawng lian lutuk lote erawh chu an kal theih ka beisei," a ti.

Central-ah Narendra Modi hruai NDA sorkarah eirukna lian tham a tam nia sawiin, CL Ruala chuan, "Modigate Scam, Vyapam Scam, PDS Corruption Scam-te a awm tawh a ni," a ti.

CL Ruala sawi danin Mizorama BSNL network ṭha lo chu an siam ṭha thuai dawn a; Agartala aṭanga National Network hmanga Mizoram thlun zawm a nih tur thu sawiin, tuna Mizorama hman lai 34 Mbps M/W chu STM-I Hyhrid System-a thlak a nih tur thu a sawi a ni.

Environment & Forest minister Lalrinmawia Ralte pawhin thu sawiin, hmunphiah hralhna sawifiah a, "NLUP hnuaia hmunphiah chíngtute hnen aṭangin royalty lak a ni ve lo a, NLUP hnuaia mi ni lo hmunphiah chíngtute aṭangin royalty lak a ni," a ti.

Hmunphiahah hian NLUP beneficiary-te chu Soil & Water Conservation department-in certificate an pek chhuah thu leh, kum 2016 chhunga hmunphiah aṭanga chhiah (royalty) hmuh beisei zat chu Rs. 66,02,800 a nih thu a sawi.

Congress party inkhawmah hian MP Ronald Sapa Tlau leh MLA PC Zoram Sangliana-te pawhin thu an sawi a ni.