KHAWTHLIR

Agri-Fair khâr

Central Agricultural University, Imphal-in College of Veterinary Sciences & Animal Husbandry, Selesiha CAU Regional Agri-Fair, 2016 a buatsaih chu Ningani leh nimin khan chhunzawm a ni a, nimin tlai khan khâr a ni. Fair-ah hian Ningani khan ui entirna (dog show) leh naute ṭha entirna (healthy baby show) huaihawt a ni a, nimin khan Handicraft Show neih a ni.

Thisen pe

NIELIT Red Ribbon Club-te chuan nimin khan an campus-ah blood donation camp an huaihawt a, mipa 71 leh hmeichhia pahnihin Synod Hospital tan thisen unit 73 an pe. ICFAI University, Mizoram pawhin nimin vek khan blood donation camp an huaihawt a, mipa 61 leh hmeichhia 10-in Aizawl Civil Hospital tan thisen unit 71 an pe. Hrangturzo bialtu MLA Vanlalawmpuii Chawgthu hmalaknain Hrangturzo 'W' Block Congress ṭhalaite pawhin nimin khan Serchhip District Hospital tan thisen unit 28 an pe bawk a, a petute mipa 26 leh hmeichhia pahnih an ni.

Jubilee lawm

Hunthar Veng Middle School, Aizawl chuan Ningani khan an kum 25-na, silver jubilee an lawm a, bialtu MLA, minister Lal Thanzara'n a hmanpui. Minister hian jubilee lawmpuina atan Rs. 50,000 leh computer pakhat a pe a ni.

Champhaiah kût

Champhai District Level Chapchar Kût Celebration Committee chu nimin khan an chairman Vanlalngaihsaka, Champhai DC hoin DC conference hall-ah an
ṭhukhawm a, Chapchar Kût neihna tura ṭul leh pawimawh thawk turin department-te chanvo hrang hrang an ruat.

Kolasib College Week khâr

Kolasib College chuan nimin khan Diakkawn YMA Hall-ah College Week an hmang a, Kolasib DC H Lalengmawia'n a hmanpui. Kolasib DC chuan, zirna lama ramin hma a sawn theihna turin zirtirtute chu nasa lehzuala inpe chunga thawk turin a fuih.