February 8 atangin Vehicle tax rate thar

Mizoram Transport Workers’ Association (MTWA) chuan nimin khan an department conference hall-ah General Assembly an hmang a; khuallian, Transport minister John Rotluangliana chuan, February 8, 2016 aṭangin vehicle tax rate thar hman tur a nih thu a sawi.

Transport Minister chuan, "February 8, 2016 aṭang hian vehicle tax rate thar hman tan tur a ni. Life-time tax, kum 15 chhung atan motor man aṭanga 6% zel lak tawh tur a ni ang," a ti.

John Rotluangliana chuan, Transport department chu department pawimawh ber pawl, revenue tam tak khawn khawmtu, mipuite’n an dawr tam pawl tak an nih avangin nasa zawka ṭan lak a ṭul thu a sawi a; hawihhâwm chhuah leh zual tur leh ṭawngkam mawi hmang hram hram ṭhin turin thawktute fuih.

Silchar-ah petrol pump leh Vairengte-ah weighbridge siam tum a nih thu sawiin John Rotluangliana chuan, "Transport department-in consumer pump a neih sate pawh revenue thawk chhuah turin hralh chhuah theihna hmun (retail outlet)-a let tura hma lak mek a ni," a ti.

Transport director L Biakthanga sawi danin, nikum chhung khan Transport department-in cheng vaibelchhe 16 chuang a thawk chhuak a ni.