Hnahthial SP office kum 1 tlin lawm

Hnahthial SP office chuan an training hall-ah nimin khan an kum khat tlin an lawm a; khuallian, district bawrhsap Vanlalmawia chuan, "Mihring nunah hian hmasawnna tura kawng hrang hranga bul ṭantu nih hi a pawimawhin a hlu hle a ni," a ti.

Vanlalmawia chuan, district adminstration leh police-te chu kal kawp tur an nih thu sawiin, "Kum khat liam taa kan hun hman thlir kîr hian a lawmawm. VC leh NGO-te nen pawh thawhhona ṭha tak neiin, Covid-19 do kawngah leh thil hrang hrangah mualphona kan tâwk loin ka hria a, thawhhona ṭha tak kan neih hi kan chhawm nun zel ka duh," a ti.

Hnahthial SP Lalbiakkila pawhin thu sawiin, office kum khat tlin lawmna chu Covid-19 vangin Hnahthiala police awmte leh sàwm bikte nen chauh lawm a nih thu a sawi a, "Eng mah neih nei loin bul kan ṭan a, tunah chuan hma kan sawn ve tawh viau a ni," tiin a sawi.

Hnahthial SP hnuaiah hian thawktu mi 117 awm tur an nih laiin, mi 49 an awm mek a; Hnahthial SP hnuai aṭanga hlawh la, hmun danga awm mi panga an awm bawk. Hnathial Police hian an kum khat tlin lawmna atan hian Hnahthial District Hospital leh Jehova Jire Home-ah Rs. 5000 ve ve an pek bakah, mipui hnenah a thlawnin hmaituamna 500 an sem.