MSIC leh Lokayukta hotu tharte Governor-in thu tiamtirin a la lut

Governor Dr Hari Babu Kambhampati chuan nimin khan Raj Bhavan-ah Mizoram State Information Commission (MSIC)-a chief information commissioner thar John Neihlaia leh information commissioner atan Mangjangam Touthang a a lut a, Lokayukta member atan Lalsanglura a la lut bawk.

MSIC hotute leh Lokayukta member lak luhna inkhawm hi Raj Bhavan Durbar Hall-ah neih a ni a; chief secretary Dr Renu Sharma-i'n ruatna lehkha Mizoram sorkar tihchhuah a chhiar chhuah hnuah Governor chuan rinawmna thu tiamtirin a la lut a ni.

Swearing-in ceremony-ah hian chief minister Zoramthanga, deputy chief minister Tawnluia bakah, minister-te leh MLA-te an tel a, sorkar hotu pawimawh dangte an tel bawk.

Chief information commissioner thar John Neihlaia, IPS (Rtd.) hi June 7, 1963-a piang niin, thiamna lamah BA a ni a; kum 1986-ah Mizoram Police Service a zawm a, kum 2011 khan IPS-ah hlan kai a ni. Mizoram bakah, Delhi leh Arunachal Pradesh-ahte police hna a thawk tawh a, December 2018 khan Mizoram IGP-ah kaiin, a pension thlengin IGP a ni.

Information commissioner thar Mangjangam Touthang hi March 1, 1963-ah a piang a, thiamna lamah B.Sc. niin Wales aṭangin Diploma in Broadcast Journalism a zo a, Indian Information Service (Rtd.) a ni. Aizawl, Kohima leh New Delhi-ahte All India Radio, Doordarshan leh Press Information Bureau-ahte a thawk a, kumin kum tir lam khan DDK, Aizawl News unit director a nih laiin pension-in a chhuak a ni.

Lokayukta member atana lak luh thar Lalsanglura hi MPS (Rtd.) a ni a, Mizoram police-ah post chi hrang hrang a chelh tawh bakah, kum 2007 khan UN Mission hnuaiah Timor Leste Island-ah a thawk a; Mizoram Lokayukta Act, 2014 Amendment Drafting Committee-ah invitee member a lo ni tawh bawk.