State Biological Control Laboratory hawng

Mizoram sorkar sum leh NABARD aṭang sum pûk cheng nuai 273.08 hmanga din, Lengpui Vengthara State Biological Control Laboratory chu nimin zing khan Agriculture minister C Lalrinsanga'n a hawng.

State Biological Control Laboratory dinna atana sum hman nuai 273.08 zinga nuai 250.56 chu NABARD-RIDF-XXV aṭanga pûk a ni a, cheng nuai 22.52 chu Mizoram sorkar sum a ni. Laboratory project-ah hian laboratory building, staff quarters leh laboratory bungraw leinate a tel a; Lengpui VC-in ram an pekah Eastmen Consultancy-in December 1, 2020 aṭangin laboratory din hna an thawk.

Laboratory hi him leh hrisel zawka thlai enkawlna tura hmalakna a ni a; thlai ei chhetu rannung hrang hrang (pangang, thlangdár, vual, adt.) tirêmtu tur rannung (parasitoid, predator leh biopesticide) leh hrik (bacteria, virus NPV, entomopathogenic nematodes leh fungi)-te tihpunna leh siam chhuahna tur a ni.

Agriculture Minister chuan, hlotúr hmanga thlai ei chhetu tihrêm tuma hmalaknain mihring hriselnaah nghawng ṭha lo a thlen ṭhin thu sawiin, "Mihring hriselna tura him zawka thlai ei chhetu rannungte ei chhe lêt vetu siam chhuahna tur laboratory din a ni ta hi Mizoram tana méllung pawimawh tak a ni," a ti a; pangang thahna biological control agent ṭangkaizia an hriat avangin ICAR-NBAIR, Bengaluru nena thawhhona hnuaiah State Biological Control Laboratory din a nih thu a sawi.

Indian Council of Agriculture Research-National Bureau of Agricultural Insect Resources (ICAR-NBAIR), Bengaluru hotu Dr K.Subaharan pawhin thu sawiin, State Biological Control Laboratory bul ṭanpui bakah, kawng engkima puih chhunzawm zel an tum thu leh mamawh hun apianga che tura an inpeih reng thu a sawi.

Hawnna inkhawm hi Agri­culture secretary H Lianzela'n kaihruaiin, Agriculture depart­ment hotu te, KVK Lengpuia thawk te, khawtlang hruaitute leh pawl ṭhenkhat hruaitute an tel.