Cheng vbc. 65 hû meth man

Mizoram Police hnuaia Aizawl District Special Branch (DSB) team leh Anti-Narcotics Task Force (ANTF) unit chuan tun hnai khan crystal methamphetamine an man a, an man hlut zawng chu cheng vbc. 65 a ni.

Lengpui Airport-a ANTF unit chuan October 3, Thawhlehni khan Airport-ah Lalremthangi (38), Myanmar lam mi, Delhi-a spa-a thawk nia inchhál suitcase aṭangin crystal methamphetamine kg. 10.4 an man a, international market-ah cheng vbc. 31 hû a tling.

Lalremthangi suitcase hi security x-ray khawla endik a nih laiin rinhlelh a nih avangin ANTF unit pun an ni a, an endik hnuah crystal methamphetamine chu hmu chhuakin, a kawltu Lalremthangi nen an man. Lalremthangi lakah Special Narcotics Police Station-ah NDPS Act leh Foreigners Act tlawhchhanin thubuai ziak luh a ni.

Aizawl DSB team chuan October 4, Nilaini zan khan Zemabawk East-ah lirthei MZ-01 7001 (Tata Intra) an enfiahnaah lirtheia a chuang Ropianga (37) s/o Lalthanga, Khawmawi, Myanmar nia inchhál hnen aṭangin crystal methamphetamine kg. 11.6-a rit an man a, cheng vbc. 34 hû a tling. Hei hi Mizoram Police-in ṭum khata ruihhlo an man hlutna a tam ber ṭum nia hriat a ni.

Ropianga lakah Bawngkawn Police Station-ah NDPS Act leh Foreigners Act tlawhchhanin thubuai ziah luh a ni a, a kaihhnawih mi dang awm theite police-te chuan an chhui mek bawk.