RIPANS-a NCDC din dan tur enfiah

Sorkar laipui Ministry of Health & Family Welfare hnuaia Health Services director general Prof. (Dr) Atul Goel leh MoHFW official dang pali chuan nimin khan Regional Institute of Paramedical and Nursing Sciences (RIPANS) an tlawh a, RIPANS-a National Centre for Disease Control (NCDC) branch din dan tur an enfiah.

Prof. Atul Goel chuan, NCDC leh RIPANS an thawhho chuan NCDC hnuaiah RIPANS zirlaite tan practical training leh research project atan remchanna tam tak a awm dawn thu a sawi a, "RIPANS-a NCDC branch-a thawk turin a ram leilung fa, ram chhung dinhmun hre chiangtute ngei lak tum a ni ang," a ti.

NCDC hi thiamna changkang ber ber hmanga thuam public health institute a ni a, hripui léng thut hmachhawn chungchangah enfiahna, vil zuina, enkawlna leh referral laboratory tihchangtlun hna thawk ṭhin a ni. NCDC headquarters chu Delhi-ah a awm a, India ramah branch pariat a nei mek.