KHAWTHLIR

Presbytery inkhawmpui

Mizoram Synod hnuaia inkhawmpui lian ber dawttu, presbytery inkhawmpui chu October 8, Pathianni tlawhchhanin neih a ni dawn a, presbytery ṭhenkhat chuan nizan khan inkhawmpui an ṭan a, presbytery ṭhenkhat chuan zaninah an ṭan dawn. Inkhawmpuiah hian chhun lamah ro an rêl ang a, zanah vantlang inkhawm a awm ṭhin dawn a, Pathianni chawhma inkhawmah kohhran upate nemngheh an ni ang.

AR-in heroin man

Assam Rifles sipaite chuan October 4, Nilaini khan Myanmar lam mi hmeichhe pakhat hnen aṭangin Mualkawiah heroin gram 149 an man a, Rs 1,04,30,000 hû a ni. Ruihhlo leh a kawltu hi Customs Preventive Force hnenah an hlan.

Kel vulh zir

Serchhip, Champhai, Kolasib, Mamit, Saitual leh Khawzawl district-a kel vulhtu mi 23-te leh anmahni hruaitu official-te chuan Lucknow khawpui daiféma kel vulh zirna hmunpui, The Goat Trust Centre an tlawh mek. Kel vulh zirna hmun tlawh hi Fostering Climate Resillient Upland Farming System (FOCUS) bultuma buatsaih a ni a; kel vulh kaihhnawih thil chi hrang hrang an zir a, October 7, 2023 hian an zo dawn a ni.

Ruihhlo do awareness

Siaha District Task Force on Ruihhlo Do chu nimin khan additional DC Lalnunmawii kaihhruaiin DC conference room-ah an ṭhu a; October 23, 2023-ah high school leh higher secondary school hrang hrang leh kohhran hrang hrang sunday school-ah a remchan anga awareness campaign thawh khatna kalpui an rêl.

Jail táng sawiho

Champhai District Legal Services Authority chu October 4, Nilaini khan district & sessions judge Liansangzuala pisaah an ṭhukhawm a, jail táng thubuai ngaihtuah laite chungchang an thlirho. Táng zingah rualban lohna vanga harsatna neite khawsak awlsamna atan hmanraw mamawh an hmuh theih dan tur leh dan kenkawh leh damdawi lama thawktu indaih lohna sutkian dan tur an sawiho bawk.

Election training

Kumina MLA inthlanpui awm tura inbuatsaihna kal zelah nimin khan Saitual district-a MLA bial pathuma flying squad leh static surveillance team-te tan DC conference hall-ah training buatsaih a ni. Flying squad leh static surveillance team-te hi inthlannaa suma intham leh inlei te, zu emaw, vote lei theihna tur thil dang emaw sem a awm lohna tura hma latu leh report a awma bawhzuitu tur an ni.

Vawk lak luh khap

Kolasib district magistrate John LT Sanga chuan African Swine Fever a lèn mek avangin Kolasib district-ah vawk leh vawk sa rêp lak luh a khap. ASF lèn lohna state-a APEDA-in a pawmpui farm aṭangin vawk sa aṭanga siam (frozen pork) lak phal a nih thu te, vawk damlo talh leh hralh khap a nih thu leh, thupek bawhchhiate chu IPC Section 188 hmanga hrem theih an nih thute a tarlang bawk.

NIELIT Centre

MADC chief executive member M Laikaw chuan nimin khan MADC Golden Jubilee building, Siahaah MADC NIELIT Study Centre a hawng. Centre hi mi 30-in computer course an zir theihna tur a ni a, a thlawna an zir theih nan MADC sorkarin hma a la a ni.