Khawhaiah champion leh sikul lawm

Khawhai khua chuan volleyball-a khua leh veng intihsiaknaa mipaa an champion leh Khawhai Higher Secondary School provincial adhoc grant-in-aid dinhmuna dah thar chu nimin khan an khaw town hall-ah an lawm a; bialtu MLA Tawnluia, deputy chief minister-in a hmanpui.

Tawnluia chuan, tun hnaia Cabinet meeting-in sikul ṭhahnem tak dinhmun sang zawka hlan kai a nih chungchagn sawiin, "Chief Minister hoin an dinhmun ngun takin kan ngaihtuah a, zirnain hma a sawn zel nan leh khawtlang mipui tam tak hahnate chhâwk zângkhai turin thutlukna siam a ni," a ti.

Mipa volleyball-ah Khawhai khua Mizoram puma an champion chu a lawmpui thu leh a chhuan thu sawiin Tawnluia chuan, "Tun hnaia kan bial ṭhalaite'n infiamnaa Zoramah meichher kan chhi ta malh malh hi a lawmawm tak zet. Hma kan sawn zel nan Khawhaiah hian field lai mekin, phûllem phah tur pawhin hma kan la mek a ni," a ti a; hnam rilru pu thar a, phâk tâwk ṭheuha ram leh hnam rawngbáwl turin mipui a chah.