Pack House for Fruits and Vegetables hawng

Agriculture minister C Lalrinsanga chuan October 5, Ningani tlai khan Tuirial Airfield-a thei leh thlai sâwngbàwlna, vawn ṭhatna leh fûnna hmun, 'Pack House for Fruits and Vegetables' a hawng.

Pack House hi kut hnathawktute thar thei leh thlai sâwngbâwlna, vawn ṭhatna leh funna (packaging) atana ruahman a ni a, sorkar laipuia Ministry of Commerce and Industry hnuaia Agricultural and Processed Food Products Export Development Authority (APEDA) kaltlanga din a ni.

Pack House hi Mizoram sorkar leh APEDA-in October 28, 2015-ah thuthlung an ziak a, CDAR ram chhungah cheng nuai 944.69 séngin din a ni. Sum senso zinga nuai 800 chu APEDA-in an tum a, Mizoram sorkarin nuai 144.69 a tum thung.

Pack House-ah hian Processing Block leh Cold Chamber Block a awm a; Processing Block-ah thei leh thlai sâwngbàwlna khawl pahnih awmin, khawlte chuan darkar khat chhungin thei leh thlai metric ton 2-3 vel an sâwngbâwl thei.

Sawngbawl hnua dahṭhatna tur cold chamber a awm a, cold chamber-a dah luh hmaa dah lailâwkna tur pre cold chamber a awm bawk.

Agriculture Minister chuan, Pack House for Fruits and Vegetables chu mipuiin chiang zawkin hria se, kut hnathawktute tiphûrtu ni se a duh thu a sawi a, "Ṭangkai taka hman tum a ni," a ti.