Tribal Research Institute hawn a ni

Kelsih khuaa Tribal Research Institute din thar chu October 5, Ningani khan Social Welfare, Tribal Affairs, Women & Child Development minister Lalrinawma'n a hawng.

Tribal Research Institute dinna atan hian Ministry of Tribal Affairs aṭangin cheng nuai 2,028.50 hmuh a ni a, March 2019-ah hna thawh ṭan niin, December 2022-ah sak zawh a ni a, contractor chu FK Construction a ni. A hmunhma zau zawng hectare 4.38 a ni a, in 13 a awm. Ladeh, hnáng hlài, puantah leh Mizo hnam thil chi hrang hrang zirna hmun tur a ni.

Zawlbuk, exhibition library leh auditorium, Mizo lal in (administrative building), conference hall, mi 50 ve ve lenna mipa leh hmeichhe dormitory, VIP cottage pali, training centre leh staff quarters-te a awm a; zawlbuk, lal-in leh in ṭhenkhat chung atan USA aṭanga chah luh di lem hman a ni.

Minister Lalrinawma chuan, changkanna kal zelah Mizo hnam nunphung leh ziarángte zawi zawiin thil dangin a thlak tih sawiin, "Research Institute hi kan hnam chìn dan, kan culture leh tradition vawn nun zel nan leh inzirna hmun ṭangkai tak a ni dawn," a ti a; Mizote chu hnam huaisen, rinawm leh taima an ni tih rilrua nghet taka pawm turin ṭhalaite a chah.

Tribal Research Institute hawnnaah hian Mizoram Indigenous Association-in Mizo infiamna leh them­thiamna thil chi hrang hrang an entir a ni.