Vairengte-Sairang kawng chhiat vangin sumdawnna lirthei tlântir rih dawn lo; CM hoin kawng siam dan tur rêl a ni

October 7, Inrinni tlai khan chief minister Zoramthanga hoin PWD hotute leh Joint Action Committee for Plyable Road (JACPR) chuan Lailapur leh Sairang inkar kawng chhia thawm ṭhat thuai dan tur an sawiho a, hmalak dan tur an ruahman. Heti chung hian bungraw phur lirthei neitu leh khalhtu pawl intélkhawm, JACPR chuan kawngpui chhe lutuk vanga vawiin aṭanga lirthei tlàntir loh an tum chu an kaltlangpui dawn.

JACPR hruaitute chuan October 5, 2023 khan press confe­rence neiin, Vairengte-Sairang inkar kawngpui chu tlanna tlâka thawm ṭhat a nih hma chuan October 9, 2023 zing dar 7 aṭangin an lirtheite tlàntir rih loh an tum thu an lo puang tawh.

Lirthei tlan lo turte chu mihring leh bungraw phur lirtheite a ni a; JAC chuan duty an indah dawn a, Assam lam aṭanga hnam dang lirthei rawn tlan ṭhinte chu rawn kal rih lo turin an chah a, Lailapur-ah lo dang turin an hriattir.

JACPR chuan, Vairengte-Sairang inkar kawng bakah, Kawlkulh leh Hliappui inkar leh Kawlkulh leh Tuichang inkarah pawh an lirtheite an tlantir rih dawn lo bawk.

Mizoram Truck Owners' Association president B Lalzarzova chuan, Vairengte leh Sairang inkar NH kawngpui a chhiat hle thu te, Manipur lama ni tin mamawh an phurhna kawng Kawlkulh-Hliappui inkar leh Champhai tlangdung lamah Kawlkulh-Tuichâng inkar a chhiat nasat thu a sawi a; chak zawka kawngpui siam a nih theih nan October 9 aṭangin tlân rih loh an rêl tih a sawi a ni.

JACPR hruaitute chu October 7, Inrinni tlaiah khan CM Zoram­thanga'n a kâwm a, PWD hotute pawh an tel. Lailapur leh Sairang inkar kawngpui chhia thawm ṭhat thuai dan tur an sawiho a, hmalak dan tur an duang.

Chief Minister chuan JACPR hruaitute chu an lirtheite tlàntir turin a ngen a; JAC erawh chuan CM ngenna chu zahawm viau mah se, kawng dinhmun thlirin an lirthei tlantirna chi-ah an ngai lo a, an rorel tawh chu kaltlangpui turin thutlukna an siam a ni.

JACPR-ah hian Mizoram Truck Owners' Association, Mizoram Truck Drivers' Asso­ciation, Mizoram Tipper Owners' Association & Drivers Association, Mizoram Oil Tanker Drivers Association leh Kolasib District Drivers Welfare Joint Action Committee an tel a; Kolasib-Aizawl maxicab-te pawh an huam vek bawk.

CM HOA ṬHUKHAWM RUAHMANNA

1. Lailapur leh Sairang inkar kawng chhe zual lai thawm ṭhat hna ṭha tak leh chak zawka thawh a nih theih nan leh motor lian tlante'n kawngpui siam sa an tihkhaihlak loh nan he lai inkar kawngah hian October 9, 2023 aṭangin motor lian tlan rih loh ni se.

2. Kawng siam hna thawk nghal tur hian NHIDCL lamin Seling leh Serchhip aṭangin truck 30 lung phur chu October 8-ah hna thawhna tura rawn dah ṭan tura tih an ni.

3. Kawng thawm ṭhat hna hi October 9, Thawhṭanni aṭangin chak taka thawh tum a ni.

4. Thawm ṭhat hna a chak thei ang bera thawh tum a ni a, motor lian kal theiha siam a nih veleh motor lian pawh tlan chhunzawm leh a ni ang.

5. Teirei lei, Dárlâka mi leh Bairabi-Zamuanga mi thawh mek hi chak taka thawk chhunzawm turin PWD-in contractor-te hriattir ni se.

6. Tuichang-Kawlkulh kawng NHIDCL-in an enkawl hi siam vat a nih theih nan Khawzawl DC-in NHIDCL leh PWD hotute ko khawmin hmalak vat dan tur rèlpui ni se.