Presbytery inkhawmpui a ṭiak Inkhawm tihtlem duh lo an tam

Mizoram Presbyterian Kohhrana inkhawmpui lian ber dawttu, pres­bytery inkhawmpui chu nizan khan a ṭiak a; nimin khan kohhran upa thlan thar ṭhahnem tak nemngheh an ni. Inkhawmpuiah hian inkhawm tihtlem chungchang ngaihtuah a ni a, inkhawm tihtlem duh presbytery panga leh duh lo presbytery 31 an awm.

Mizoram Synod hnuaiah presbytery 47 a awm mek a, presbytery tam ber chuan October 5, 2023 khan inkhawmpui an ṭan a, presbytery tlem azawngin October 6-ah an ṭan thung. Kawng chhiat lutuk vanga inkhawmpui thei rih lo Khawthlangtuipui Presbytery a awm bawk.

Kohhran upa thlan thar, exam paltlangte chu nimin Pathianni chawhma inkhawmah presbytery moderator-te'n an nemnghet a; chawhnu inkhawmah Lalpa Zanriah Sakramen ṭheh a ni.

Presbytery inkhawmpuiah hian thu pawimawh tak tak rèl a ni. Synod hmunpui lamin ngaihtuah tura a tih angin presbytery tinin 'inkhawm tihtlem chungchang' an ngaihtuah a; presbytery 37 thutlukna hriat theih chinah presbytery pangain inkhawm tihtlem an duh a, presbytery 31 erawh chuan tihtlem an duh lo thung. Rorelnaa ngaihdan inzat chiah presbytery pakhat a awm bawk.

Inkhawm tihtlem rawtna hi Synod Inkhawmpui 2022-ah khan Aizawla presbytery pakhat aṭangin a lut a, Synod Inkhawmpui chuan Synod Executive Committee (SEC) bawhzui turin a dah. SEC ruahman angin questionaire siamin tualchhung kohhran hrang hrangah kohhran mipui ngaihdan lâk a ni tawh a, SEC chuan presbytery inkhawmpui ngaihdan a la leh a ni.

Inkhawmpui rorelah hian presbytery eng emaw zatah ruihhlo do leh dan loa sumdawnna kalpui chungchang ngaihtuah a ni a; Mizoram pum kaihhnawih thil agenda pawimawh tak tak dang a awm nual bawk. Agenda pawm zinga eng emaw zat chu Synod inkhawmpuia kal zel tura dah a ni.