KHAWTHLIR

Thisen pe

October 7, Inrinni khan KṬP, Serchhip Pastor Bial chuan Serchhip District Hospital tan thisen unit 30 an pe a, petute mipa 24 leh hmeichhia paruk an ni. ṬKP, Lunglei Venglai unit-in Civil Hospital, Lunglei tan unit 27 pein, petute mipa 20 leh hmeichhia pasarih an ni a; ECM hnuaia KTP, Siahatla Branch, Bethlehem Branch leh Trinity Branch ten Siaha District Hospital tan unit 22 pein, petute mipa 17 leh hmeichhia panga an ni. Wesleyian Methodist Church, Kolasib-te'n Kolasib District Hospital tan unit sarih an pe bawk.

Tuipuiral Hmathlir

Tuipuiral Zirlai Pawl chuan October 6, 2023 zan khan Hyve Aizawl City Hall-ah kumina MLA inthlanpui awm tura East Tuipui biala political party hrang hrang candidate turte pualin Tuipuiral Hmathlir an buatsaih. INC candidate C Lalnunthanga, MNF candidate Ram­thanmawia leh ZPM candidate Dr C Lalram­mawia ten thupui chi thuma hmalak an tum dante an sawi bakah, zawhna leh chhanna hun hman a ni.

Inthlan senso bituk

Serchhip additional DC James Lalnithanga hoin October 7, Inrinni khan Serchhip DC conference hall-ah kumin MLA inthlanpuia candidate-te campaign senso chhûtna atana hman tur thil man bituk a ni. ECI chuan Mizoram MLA inthlanpui neih turah candidate pakhat tan cheng nuai 28 aia tam hman a phal lo.

Minister ngen

ZPM Ṭhalai president Dr C Lalrammawia chuan Vangchhia Middle School-ah Hindi zirtirtu dah tura ngenna October 6, 2023 khan School Education Minister hnenah a thehlût a; zirlai naupangte'n Hindi an zir theih loh avangin Hindi teacher dah ngei turin Education Minister a ngen a ni.

Village volunteer

Lamka, Churachandpur, Manipur-a Mizote veng tura din Mizo Village Volunteer training third batch-te chu October 7, Inrinni khan YMA Complex, Hmuia Veng, Lamka-ah passing-out- parade neihpui an ni a; Mizoram aṭangin MZP president H Lalthianghlima leh a thawhpuite'n an hmanpui.