Narendra Modi-a hnuaiah kei Kristian hi Central minister ka ni thei - John Barla

Union Minority Affairs minister of state John Barla chuan October 6, 2023 zan khan tun hnaia MLA aṭanga báng ta Dr K Beichhua chu BJP-ah a lawm lut a; BJP sorkarah Kristiante enhranna a awm lo nia sawiin, amah pawh Kristian a ni a, Narendra Modi kaihhruai sorkarah minister a ni thei tih a sawi.

Lak luhna inkhawm hi Hotel Regency-ah buatsaih a ni a, Mizoram BJP president Vanlalhmuaka'n a kaihruai. John Barla chuan, "Pu Modi-a kaihhruaina hnuaiah kei Kristian hi central minister ka ni thei a, Pu Modi-a hmalakna leh thil tum hi a ropui hle a, sawi thiam har khawpin a hnathawh hi a ropui," a ti.

John Barla chuan, mi taima leh hna thawk ṭha apiangte BJP chuan mipui tana rawngbawl turin an thlang chhuak ṭhin nia sawiin, "Kei pawh mi thiam leh mi bik ka ni bik lo a, nimahsela, central hruaitute'n ka hnathawh an hmuh avangin BJP ticket min pe. Hnam tlem zawkte hi BJP-in min ngaihsak hle a ni," a ti a, hnam hnuaihnung anga lang leh hnam tlem zawkte'n India ram hruaitu nihna chanvo pawimawh tak takte an chelh thu a sawi.

Inkhawmah hian Nagaland deputy chief minister Y Patton pawhin thu a sawi a; Assam deputy speaker Numal Momim leh BJP National secretary Rituraj Sinha te pawh an tel a ni.