Champhaiah kawngpui dinhmun thlirho

Mizoram Assembly Election, 2023 hmachhawn tura inpuahchahna kal zelah October 6, 2023 khan Champhai district election officer James Lalrinchhana, bawrhsap kaihhruaiin Champhai district-a inkalpawhna kawngpui dinhmun thlirho a ni a; polling station 84 zinga 78-te chu a panna kawng a ṭha tih tarlan a ni.

Ṭhutkhawmah hian Champhai district inthlan kaihhnawih hotu te, PWD Mizoram Champhai Division, 74-RCC (GREF) Border Road Task Force (BRTF) leh National Highways & Infrastructure Development Corporation Ltd (NHIDCL), PMU-Seling hotute an tel.

James Lalrinchhana chuan, kawng chunghanga mawhphurtu PWD, BRTF leh NHIDCL hotute chu an hma zawn ṭheuhah a ṭul anga hma la nghal turin a hrilh a, "Inthlan hlawhtling taka neih a nih theih nan inkalpawhna kawng ṭha tak a awm a ṭul. Kawng siam chu hun rei lotea zawhfel thut a nih theih loh avangin tun aṭangin ruahmanna mumal tak lo siam lawk in, a theih angin hma la vat ang che u," a ti a; inthlan ni leh a dawn ni phei chu ngai pawimawh zual tur leh inkalpawhna chhiat vanga harsatna awm lo tura hma lo la turin a chah a ni.

Tarlan danin, Champhai district-ah polling station 84 a awm a, heng zinga 78 chu a panna kawng black topping/white topping niin, kawng a ṭha tih tarlan a ni a; polling station paruk – Hruaikawn, Saikhumphai, Chawngtui East, Thekpui, Pamchung leh Murlen panna kawngte chu kaccha road/fair weather road a nih thu tarlan a ni bawk.