Sapthei sâwngbàwlna lungphùm phúm

Minister of state TJ Lalnuntluanga chuan October 7, Inrinni khan a bial chhunga New Champhaiah sapthei sâwngbàwlna, Passion Fruit Processing Unit sakna tur lungphùm a phúm a; "Kum tina loneih kan bànsan tial tial a, huan nghet kan uar zel a ṭul a, hei hi sorkar policy pawimawh a ni," a ti.

Passion Fruit Processing Unit hi North Eastern Council (NEC) sum nuai 685 hmanga din tur a ni a; civil work atan cheng nuai 185 dah niin, sapthei sawngbawlna khawl hrang hrang leina atan cheng nuai 500 ruahman a ni.

TJ Lalnuntluanga chuan, Champhaia sapthei chíngtute'n an harsatna leh mamawhnate a hnena an thlen ṭhin chu sorkar laipuiiah an bawhzui thu sawiin, "Chief minister Pu Zoramthanga'n Champhai district-a sapthei chíngtute mamawh a ngai pawimawh a, he project hi NEC project dilna zingah ngaih pawimawhah a dah,"a ti a; khawvel changkang zelah ramngaw leh nungchate humhalh chunga hmalak zel a ṭul thu a sawi.

Sapthei sâwngbàwlna chu hmasawnna daih rei leh tlo neihna tura hmalakna a nih thu sawiin Minister chuan, "He project hmalakna kal mekah hian Mualkawi leh Ngur khuaahte Horticulture department hmalaknain pioneer project-in kut hnathawktute'n sapthei an chíng mek a ni," a ti.