Lirtheia chetsualnaah mi 2 thi

October 6 zan leh October 7, 2023 khan hmun hnihah lirtheia chetsualna avangin mi pahnihin nunna an chan phah.

October 6 zan khan Lairam Isua Krista Baptist Kohhran (LIKBK) Lungtian Pastor Bial inkhawmpui Bethani Kohhrana neiha kal F Lalduatkimi (47) w/o S Malsawmsanga, Lungtian chu inkhawm banah lirthei (ignis car) a chetsualna avangin a thi.

Inkhawm banah F Lalduatkimi leh a thiante pahnih chu, F Lalduatkimi pasal S Malsawmsanga hian thlah a tum a, motor an dahna bul lawk kawngthlangah an tlan liam a ni. S Malsawmsanga hi kohhran upa niin, an bial asst. secretary a ni a, thil tih tur pawimawh dang a la awm avangin a nupuite a thlah zawha let leh tum a ni.

F Lalduatkimi hian a tukhum sawhin, chetsual hlimah a thi nghal loa, minute 30 vel buaipui a nih hnuah a thi. Motor-a chuang ve Ramnuni chu a thluakah thi a tling ni a hriat niin, Lunglei damdawi in an panpui. S Malsawmsanga leh motor-a chuang ve dang pakhat chuan hliamna lutuk an tuar lo ni a hriat a ni.

October 7 chawhma dar 10 vel khan Mamit leh Bawngva inkarah truck leh bike an insu a, bike khalhtu Lalrinsanga (22), Bawngva khuain nunna a chan

Mamit Police aṭanga thudawn danin, truck hi Mamit aṭanga Bawngva lam pana tlan niin, bike hi Mamit lam pana tlan a ni thung a, kawng ngil laiah an insu a ni. Bike khalhtu Lalrinsanga chu a hliam tuar loin chetsualna hmunah hian a thi. Truck khalhtu hi Mizo, niin, Mamit Police-te chuan thuzawhfiah atan an la nghal.