Zirlaite hnenah lawmpuina/ṭanpuina hlân

Lengteng bial leh Siakal Range Development Council (SRDC) chhunga zirlai thiam thei, chhungkaw harsate ṭanpuina leh kumin HSLC leh HSSLC-a ti ṭhate hnenah October 7, Inrinni khan lawmpuina leh ṭanpuina hlan a ni a; Lengteng bialtu MLA Dr L Thangmawia, SRDC chairman ni bawk leh PUC principal Prof. H Lalthanzara ten an hmanpui.

Inkhawm hi State Archive hall-a buatsaih a ni a, Lengteng bial sikula HSLC distinction-a pass zirlai pariat hnenah smartphone, HSSLC distinction-a pass zirlai pahnih hnenah laptop hlan a ni. Lengteng bial aṭanga first division-a pass chhungkaw harsa zirlai 23 hnenah MLA fund aṭangin ṭanpuina Rs 3,45,000 sem a ni a, SRDC chhunga zirlai 22 hnenah SRDC fund aṭangin ṭanpuina Rs 3,14,000 sem a ni bawk.

MLA Dr L Thangmawia chuan, MLA inthlanpui awm turah Lengteng bial aṭanga thlan tlin leh a nih chuan bial chhung zirna-ina ti ṭhate tan Delhi leh India ram hmun remchangah study tour a buatsaih dawn thu a sawi a, "Zirlai, anmahni class-a pakhatna hauh phate chu tel sa an ni dawn," a ti. A bial chhunga zirlaite'n zirnaah inelna thianghlim an neih beiseiin distinction-a pass chinte hnenah smartphone leh laptop pek ṭhin an nih thu a sawi bawk.

Prof. H Lalthanzara chuan, mark aiin thiamna a pawimawh zawk tih sawiin, "Board leh university mark-te hi pawimawh viau mah se, tunlaiah chuan thluaka thiamna zawk kha a pawimawh telh telh tawh. College-a thawk tur laknaah pawh mark aiin an thiamna neih eng nge tih interview-naah kan en ṭhin," a ti a; zirlaite chu a nuam lam kalsan a, rim taka Pathian ṭih chunga zir tur leh beidawng lo turin a chah.