Zangnadawmna la tawh, chhuak lote Ni 60 chhunga chhuak tura tih an ni

Lunglei DC Ramdinliani leh Hnahthial DC Chuauhnuna te chuan an district-a NH-54 kawngpui laih zauh tura zangnadawmna pek tawh, an ram la chhuahsan lote leh ram lâk chhunga in sa thar lehte chu ni 60 chhunga an ram chhuahsan tura hriattirna (eviction notice) an pe.

Lunglei leh Hnahthial district bawrhsapte hian October 7, Inrinni khan DC pisa pahniha zangnadawmna buaipuitu te, NHIDCL hotute leh contractor-te nen Bungtlang, Rawpui, Pangzawl leh Thiltlang khuate an tlawh a, zangnadawmna dawng tawh zinga an ram la chhuahsan lote chu ni 60 chhunga chhuak turin hriattirna an pe a ni.

Bawrhsapte chuan, kawngpui zauhna atana zangnadawmna pek ngaite chu kum 2019 aṭangin pek an ni tawh tih tarlangin, "Hmaih leh tih dik loh palh tlem hmabak la awm tih loh chu ram neitute'n an dawn tur ang an dawng tawh. Sorkarin ram a lak tawh la chhuahsan lo an awm nual avangin kawngpui siam hna kal lai a muan phah hle a ni," an ti.

Sorkar thuchhuah tarlan danin, zangnadawmna pek tawh zinga an ram la chhuahsan lote chungchang chu sorkar laipui beng a thleng tawh a, Prime Minister hoa state tin chief secretary-te ṭhutkhawm awm turah sawiho a ni dawn. Sorkar laipui hotute chuan, competant authority for land acquisition leh district collector tinte chu a rang lama hma la turin a hriattir a ni.