ZPM-in street campaign an buatsaih

ZPM party chuan October 7, Inrinni zing khan Aizawl South-II biala ITI Veng bazar leh Aizawl East-I biala Ṭhuampuiah street campaign an buatsaih a; ITI Vengah bialtu MLA Lalchhuanthanga'n thu a sawi a, Ṭhuampuiah East-I biala ZPM candidate tur Lalthansanga'n thu a sawi.

Lalchhuanthanga chuan, kalphung thar mipui sorkarah ṭhalaite hmakhua an ngai pawi­mawh dawn tih sawiin, "Ṭhalaite'n mahnia ei an zawn ve theihna turin hand holding policy kan nei a, kutkawih eizawnna ṭha leh changtlung an awm theih nan hma kan la dawn. Kut hnathawktute thlai thar leina turin budget-ah pawisa kan dah dawn a, thlai thar man man zawka kan hralh theih nan nasa takin hma kan la dawn a ni," a ti.

Lalthansanga chuan, Aizawl East-I bialah MLA-a tling tura rin ber a ni tawh nia sawiin, "Kalphung thar chuan mi tin huap zo, hmasawnna rualkhai kan siam dawn avangin kan zavaia tán leh ṭhangthar lo awm zel tur atan ZPM vote ṭheuh turin kan insáwm a ni,” a ti a; political party dangte aupui leh ZPM aupui a inan loh thu a sawi.