Khawzawl district chhunga kawngpui thawm ṭhat dan tur thuneitute'n an rêl
Khawzawl bawrhsap K Lalrohlua kaihhruaiin nimin khan PWD, NHIDCL, Joint VC leh tlawmngai pawl hruaitute'n NHIDCL enkawl Tuichang-Kawlkulh inkar kawng thawm ṭhat dan tur leh Khawzawl district-a inkalpawhna kawng siam leh enkawl dan an thlirho. Tuichang-Kawlkulh inkarah kawng a tlo zawk theih nan tui luankawr ṭha tak siam ni se, an ti.
Ṭhutkhawmah hian, November 7, 2023-a MLA inthlanpui neih tur leh October 24-26, 2023 chhunga Biatea YMA General Conference neih tur hre chungin Khawzawl district-a PMGSY kawngte a rang thei ang bera thawm ṭhat an rêl. Kawlkulh-Tuichang kawng enkawltu contractor Dhariwal Buildtech-in October 9, 2023 aṭangin kawng thawm ṭhat hna an thawh nghal thu tarlan a ni a, kawng a tlo zawk nan tui luankawr ṭha tak siam ni se, an ti a ni.
Hnathawh enfiah turin Joint Inspection Team an din a; CALA aiawh, SP aiawh police inspector aia hniam lo, PWD executive engineer aiawh junior engineer aia hniam lo, Joint VC leh NGO aiawhte an tel a ni.
HMALAK DAN TUR AN RELTE
- Chak zawka Kawlkulh-Hliappui kawng thawm ṭhat hna thawh a nih theih nan Saitual DC-in September 12, 2023-a Saitual-Hliappui kawnga lirthei lian (HMV) kal khapna thupek a chhuah chu kar hnih chhung tal ngaihhnathiamna siam turin Khawzawl DC-in ngen se.
- November 7, 2023-a MLA inthlanpui neih tur leh October 24-26, 2023 chhunga Biatea YMA General Conference neih tur hre rengin Khawzawl district-a PMGSY kawng Khawzawl-Biate, Rabung-Pamchung, Chalrang-Riangtlei te a rang thei ang bera thawm ṭhat ni se.
- Khawzawl damdawi-in aṭanga Tuimuk (Neidawn panna kawng) chu Balaji Constructions-in November 3, 2023 hma ngeiin thawm ṭha se.
- Tuisenphai-Khawzawl Hermon Veng kawng enkawltu SBCC chu October 10, 2023 hma ngeia kawng chhe zual thawm ṭhat hna thawk zo tura hriattir a ni a; Joint Inspection Team-in October 15, 2023-ah an enfiah ang.
- JNV, Khawzawl panna kawng tichhetu contractor SBCC chu November 2023 chhung ngeia siamṭha tura hriattir a ni.
- Tuisenphaia Khawzawl district checkgate chu kawngpui thar (NH-06)-ah sawn ni se, contractor leh Khawzawl SP-in lo ngaihtuah se.