BJP din chhan Mizoram tan a ni - MBJP President

BJP, Mizoram Pradesh president Vanlalhmuaka chuan nimin khan an party pisaa inkhawmah thu sawiin, BJP an din chhan leh an awm chhan chu sakhua, ram leh hnam a him nan leh Mizoram tan a nih thu a sawi.

Vanlalhmuaka chuan, Mizorama political party-te chu politics an khelh chhanah an chiang lo ṭhin nia sawiin, "Keini BJP chuan kan din chhan leh kan awm chhan chu kan sakhua leh kan ram leh hnam a him nan leh Mizoram tan a ni," a ti.

Mizoram mipui kutah kum nga chhunga Mizoram hma lam hun a awm tih sawiin Vanlalhmuaka chuan, "Mipui sorkar, party bil emaw, chhungkaw bil emaw sorkar ni loin, mipui tana ding ṭhin leh hna thawk ṭhin sorkar kan neih a ngai. Mizoramin development kan la hmuh ngai loh, sorkar tawhte aṭanga kan beisei ṭhin si kan hmuh theih nan BJP sorkar kan neih ngei a ngai," a ti a, sorkar laipui nen lungrual taka hna thawh a ṭul thu a sawi.