New Market sak ṭhat mek enfiah

Deputy chief minister Tawnluia chuan nimin khan Aizawl Smart City Ltd. hnuaia Aizawl New Market sak mek a tlawh a; contractor-te chu ṭha taka hna thawk tur leh khaw chin thlira hnathawh theih hun chhung ngeia sa zo turin a chah.

Tawnluia chuan, bazar sak mek vanga a chhunga eizawngte leh a bul hnaia sumdawngte tana harsatna awmah hriatthiamna a ngen a, "Smart City Project a nih avangin a sakna tur sum awm sa a ni a, contractor-te pawh an sak zawh rual ruala sum pek tlâk theih a ni. Smart City project hi June 2024 thleng a ni a, mipui thlawpna leh ṭawiawmna ka ngen tak meuh a ni," a ti. Bialtu MLA Robert Romawia Royte, minister of state pawhin thu a sawi.

New Market building thar tur sak mek hi 'City Centre at Bara Bazar, Aizawl' tih project a ni a, Aizawl Smart City Mission hnuaiah sak ṭhat a ni. Cheng nuai 4,159 ruahman a ni a, con­tractor chu Lushai Engineers a ni.