Minister-in hall pahnih a hawng

Rural Development minister Lalruatkima chuan nimin zingah khan Sairang leh Sairang Dintharah community hall sak thar a hawng a; Sihhmuiah petrol leh diesel tam tak dah khawlna siam turin hmalak mek a nih thu a sawi.

Sairang Dinthar community hall sak ṭhat nan cheng nuai 20 hman niin, Sairang community hall sak nan cheng nuai 25.50 hman a ni a; Tlangnuam BDO kaltlanga thawh ve ve a ni.

Lalrutakima chuan, Ministry of RD-in tehkhawng a siam hmanga India rama RD department ti ṭha a thlan zingah Mizoram chu pahnihna a nih thu a sawi a, "RD department chuan thingtlang khua leh a chengte'n lei rem an rah theih nan kawng hrang hrangin hma a la ṭhin. Sihhmuiah petrol leh diesel ṭhahnem tak dah khawlna (depot) siam tura hmalak mek a ni," a ti.

Sairang leh a chhehvel khuate chu khaw tlawmngai leh ṭanpui ngaite tana pên chhuak ṭhin an nih thu sawiin Lalruatkima chuan, "Hnam, ram leh sakhua humhim bakah tlawmngaihna, huaisenna, rinawmna leh taimakna nena kan ram kan enkawl chuan kan intodelhin, kan ram a dam ang a, kan dingchhuak thei dawn a ni," a ti a; ram leh hnam hmangaihna leh dah sanna thinlung pu tlat turin a chah. Bialtu MLA Zothantluanga'n thu a sawi bawk.