Mizoram Cleanliness Competition hawng

Siaha DRDO conference hall-ah nimin khan Mizoram Cleanliness Week khârna leh Mizoram Cleanliness Competition hawnna hun hman a ni a, additional DC Lalnunmawii'n a hmanpui. Nimin vek khan Mizorama khaw fai ber ni mek Ngopaah Cleanliness Competition hawnna hun hman a ni.

Lalnunmawii chuan, Cleanliness Week chu sorkarin programme hman hun tura a ruat a nih thu sawiin, hapta khâr hnuah pawh faina lamah ṭan la zel turin mi tin a chah a, "Faina hian tàwp chin a nei tur a ni lo a, tihphungah kan neih a ṭul. Mizorama district fai leh thianghlim ber ni turin theihtawp chhuah a ṭul a, Siaha khawpui a lo fai a, a thianghlim zawk theih nan mi tinin mawhphurhna kan nei vek," a ti.

Ngopaah pawh an khaw kawtchhuahah Mizoram Cleanliness Competition hawnna hun hman a ni a, Saitual SDO (Civil) H Lalramliana'n a hawng. H Lalramliana chuan, Ngopa khua chuan faina an ngaih pawimawh zual zel a pawimawh thu sawiin, faina lamah mite entawn tlak ni tura nasa lehzuala thawk turin a chah.

Kumin Mizoram Cleanliness Competition thupui chu '3R-Reuse, Reduce, Recycle' tih a ni.