Vanglaini logo

Mizoram inthlan hun Nov. 7, 2023; SEDP sem chhunzawm phal a ni lo


Election Commission of India (ECI) chuan Mizoram Legislative Assembly General Election neih hun tur nimin khan a puang a; November 7, 2023 (Thawhlehni)-ah vote thlak a ni dawn a, December 3, 2023 (Pathianni)-ah vote chhiar a ni ang. Mizoram CEO chuan, Election Model Code of Conduct hman a nih tawh avangin SEDP sem chhunzawm phal a ni tawh lo tih a sawi.

Chief election commissioner (CEC) Rajiv Kumar chuan nimin khan Delhi-ah press conference neiin, Mizoram bakah, Chhattisgarh, Madhya Pradesh, Rajasthan leh Telangana state assembly inthlan hun tur a puang. State pangate inthlan vote thlak hun tur a inang vek lo a, vote erawh December 3, 2023-ah chhiar vek tura ruahman a ni.

ECI-in a ruahman dan chuan, Mizoram Assembly inthlanpui neih tur chungchangah hian October 13-ah hriattirna chhuah a ni dawn a, October 20 thleng nomination thehluh theih a ni ang. Nomination paper-te chu October 21-ah endik a ni ang a, October 23 thleng inhnuhdawh theih hun hawn a ni dawn. November 7, Thawhlehniah vote thlak a ni ang a, December 3, 2023 (Pathianni)-ah vote chhiar a ni ang.

Mizoram chief electoral officer (CEO) Madhup Vyas chuan nimin khan IPR Audi­torium-ah press conference a nei a, Mizoram inthlanpui buatsaih tur chungchang a sawifiah a; Mizoram mipuite chu vote thlak vek turin a sáwm.

CEO chuan, Mizorama inthlanna muanawm, zalen, thianghlim leh felfai a awm theih nan thawhpuiah Mizoram mipui a sáwm a, "Mizoram mipui vote nei zawng zawngte vote thlâk vek turin ka sáwm a, inthlanna tluang taka kan neih a, zalen tak leh muanawm taka kan inthlan theih nan leh vote tlak ṭhatna ber kan nih theih nan mipuite thawhpuiah ka sáwm a ni," a ti.

Socio Economic Deve­lopment Programme (SEDP) sem zui zel phal a nih leh nih loh leh, SASCI hnuaia hna thar pek phal a nih leh nih loh zawhna chhángin CEO chuan, "Model Code of Conduct dan angin phal a ni tawh lo. Mahse, thil eng emaw bikah chuan ngaihhnathiamna pek theih dan a awm," a ti a, chutiang tur chuan ECI-ah dil theih a nih thu a sawi.