Mizorama kawngpui chhia vangin sumdawnna lirtheite an tlân rih lo ṭan
Lirthei neitu leh khalhtu pawl intélkhawmna, Joint Action Committee for Plyable Road (JACPR) chuan ruahmanna an lo siam tawh angin, kawngpui chhe lutuk vang leh chak zawka kawngpui chhia thawm ṭhat a nih theih nan nimin aṭang khan sumdawnna lirtheite an tlàntir lo ṭan.
JACPR hian Vairengte-Sairang inkar kawng bakah, Kawlkulh leh Hliappui inkar leh, Kawlkulh leh Tuichang inkar kawngah an lirtheite an tlantir rih dawn lo a; sumdawnna lirthei tlan lui an awm loh nan hmun eng emaw zatah duty an indah.
PWD enkawltu Chief Minister hoa October 7, 2023-a an lo sawiho tawh angin, October 8, Pathianni aṭang khan hmun ṭhenkhatah chuan kawngpui thawm ṭhat hna thawh ṭan nghal a ni a, nimin lamah pawh ngawrh taka thawh a ni. Kawngpui thawm ṭhat hna thawhte chu nimin khan JACPR hruaitute chuan an tlawh.
JACPR hruaitute chuan October 5, 2023 khan press conference neiin, Vairengte-Sairang inkar kawngpui chu tlanna tlâka thawm ṭhat a nih hma chuan October 9, 2023 zing dar 7 aṭangin an lirtheite tlàntir rih loh an tum thu an lo puang tawh. Lirthei tlan lo turte chu mihring leh bungraw phur lirtheite a ni.
JACPR-ah hian Mizoram Truck Owners' Association, Mizoram Truck Drivers' Association, Mizoram Tipper Owners' Association & Drivers Association, Mizoram Oil Tanker Drivers Association leh Kolasib District Drivers Welfare Joint Action Committee an tel a; Kolasib-Aizawl maxicab-te pawh an huam vek bawk.
Kawng thawm ṭhat chungchangah hian Mizoram sorkar thuchhuah chuan, October 8, 2023-ah hna ṭan nghal a nih thu leh, Vairengte-Sairang inkara kawng chhe zual laite chu PQC (concrete road) half lane-a siam ṭan nghal a nih thu a tarlang. Pathianni tlai thlenga PQC-a kawngpui chanve siam tawh chin chu metre 162 a ni.
Sorkar thuchhuah tarlan danin, Kolasib leh Kawnpui inkara kawng chhe zual laiah nimin zing khan Kawnpui quarry aṭangin lung phurh luh a ni a, hmanraw dangte leh hna thawktu turte dah luh a ni bawk.