Congress party-in two wheeler taxi-te ni tam zawk tlân chhuahtir an tum

Mizoram Pradesh Congress Committee vice president Lalnunmawia Chuaungo chuan, lirthei hmanga eizawngte chu ṭang puihna an chhawpsak ngei dawn thu a puang a; Congress party an sorkar chuan two wheeler taxi-te ni tam zawk an tlân theih nan leh sorkar leh mimal two wheeler-te chauh an intlân chhâwk theih nan ruahmanna an siam dawn thu a sawi.

Lalnunmawia Chuau­ngo leh MPCC hruaitute chuan nimin khan Aizawl Press Club-ah thuthar thehdarhtute an kâwm a; Congress party-in October 5, 2023 khan Mizoram Maxicab Asso­ciation, Aizawl City Bus Owner's Association leh Two Wheeler Taxi Association-te nen in­remna thuthlung an siam thu an tarlang.

MPCC hotute chuan, Mizoram sorkarin Aizawlah two wheeler taxi-te indîp ria vek khawpin permit a pe chhuak tam nia sawiin, "Intlân chhâwk vangin an tuar nasa. Intlân chhâwk hi sorkarin a ṭul a ti a nih pawhin, sorkar leh mimal two wheeler-te chauh an intlân chhâwk zawk theih nan ruahmanna siam a ni ang," an ti.

Congress party sorkar ta se, two wheeler taxi-te intlan chhâwk an tihtawp dawn leh dawn loh zawhna chhangin Lalnun­mawia Chuaungo chuan, "Kan titawp ang chu kan ti chiah lo a, mahse, uluk deuhin kan ngaihtuah ang a, kan chhût ang a, tun aia tam zawka tlantir ngei kan tum. Kar khata ni ruk an tlân theih chu duh­thusam, a theih chiah loh pawhin a tam thei ang ber an thlan theih nan kawng kan dap dawn," a ti a; two wheeler taxi dinna mumal leh remchang sorkarin a buatsaihsak dawn thu a sawi.

MPCC hotute chuan, maxicab-te permit one time replacement theih tih chu an sorkar chuan an ennawn tih sawiin, "All Mizoram permit tihtawp ennawn a ni ang a, a duhte tan chauh all Mizoram permit pek a ni a ni ang. Dinna chungchanga harsatna an tawh mek pawh ngaihtuahsak nghal an ni dawn," a ti.

City bus chungchangah MPCC hotute chuan, "City bus permit vawi khat chauh replacement theih tih chu Congress a sorkar chuan tihtawp a ni ang tiin October 5, 2023-a inremna siamah tarlan a ni," a ti a; city bus-te'n an zin dawn apianga special road permit an lak ngai ṭhin chu awlsam zawka tih turin an ruahman dawn thu leh Aizawl khawpui chhung atan terminal hmun thumah siam an tum thu a sawi.

MPCC Vice President chuan, lirthei khu endik (pollution test) chungchangah lirthei neitute tana awlsamna zawnsakin, oil depot remchangah dah tura hmalak an tum thu a sawi a; insurance chungchangah lirthei neitute tana awlsam zawk leh rang zawka tih a nih theih nan insurance company-te'n Mizoramah regional office an neih ngei theih nan hmalak an tum thu a sawi bawk.